O libro confórmase a partir dos opostos construír e deconstruir. O xogo e a confrontación destes dous termos establecen un campo artístico e de experimentación de carácter escultórico inspirado no mundo da arquitectura e o urbanismo. A peza componse dun libro e unha caixa. Os materiais utilizados referentes ao campo da arquitectura son unha constante: cartón, papel vexetal ou papel milimetrado. O libro articúlase a partir de fotografías, textos, mapas cartográficos, despregamentos de papel e recortes.

A súa estrutura organízase mediante tres formas arquitectónicas da cidade de Vigo. O percorrido iníciase con imaxes dunha ponte (chamada scalextric); é un elemento urbano que se construíu e se destruíu sen chegar a ser usado. A continuación preséntase a Panificadora (fábrica de pan e fariñas) como espazo industrial de traballo abandonado e en destrución polo paso do tempo e o esquecemento, e remata co Colexio Oficial de Arquitectos como exemplo de nova arquitectura de carácter deconstructivista. Móstranse diferentes aspectos da cidade: o desenvolvemento urbanístico, o abandono, a destrución, a deconstrucción, o esquecemento, a ruína, a ausencia, a reconstrución, o novo...